Twf Gyrfa Cymru yn helpu gŵr ifanc graddedig o Fangor i gamu ar yr ysgol yrfaol

Mae gŵr ifanc a raddiodd o Brifysgol Bangor a oedd yn ystyried symud i Loegr neu’r Alban ar ôl cael trafferth dod o hyd i swydd yn dweud mai i raglen cyflogaeth ieuenctid Twf Swyddi Cymru mae’r diolch am ei helpu i gamu ar yr ysgol yrfaol yn nes adref.

Graddiodd Curtis Edwards, 24, o Faesgeirchen, Bangor, gyda gradd dosbarth cyntaf mewn Peirianneg Systemau Cyfrifiadur yn ystod yr haf 2016. Ni chafodd ei swydd gyntaf tan fis Medi 2017 - gyda Risc IT Solutions, yn Llandudno, Conwy.

Ennill profiad drwy Twf Swyddi Cymru

"I mi, mae Twf Swyddi Cymru wedi bod yn fuddiol ac mae wedi fy ngalluogi i gael y profiad gwaith rydw i ei angen i ddilyn fy ngyrfa
yn lleol"    

Medai Curtis, technegydd TG sy’n gweithio yn yr adran cymorth technegol yn Risc IT Solutions: “Mae gen i ddiddordeb mewn cyfrifiaduron erioed. Mae fy nhad yn gweithio yn y diwydiant hwn hefyd ac mae yna gyfrifiaduron a gemau consol a darnau o gyfrifiaduron o amgylch y tŷ i gyd.

“Ar ôl graddio, cefais ychydig o amser i ffwrdd, tan y Nadolig 2016, oherwydd rhwng yr arholiadau Safon Uwch a’r cwrs gradd pedair blynedd, roeddwn wedi bod mewn addysg llawn amser ers chwe blynedd. Dechreuais chwilio am waith ym mis Ionawr 2017.

“O’r holl geisiadau, fe wnaeth tua 15 i 20 ddod yn ôl ata i ond roedden nhw i gyd angen blwyddyn neu ddwy o brofiad a doedd hynny ddim gen i. Dyma benderfynu gwneud cais am lawer mwy o swyddi a chlywed dim byd o gwbl. Cefais ddau gyfweliad ond daeth dim byd ohonyn nhw.

“Roeddwn am aros yn y gogledd-orllewin ond erbyn i mi wneud cais i Risc IT Solutions, roeddwn wedi cyrraedd pwynt lle’r oeddwn yn meddwl ‘os nad ydw i’n cael y swydd hon, waeth i mi gysgu ar soffa fy ffrindiau ym Manceinion neu Glasgow a gobeithio cael lwc efo hynny.”


Agor y drws i gyfleoedd newydd

Yn ffodus, llwyddodd, Curtis i sicrhau swydd gyda Twf Swyddi Cymru fel technegydd TG dan hyfforddiant yn Risc IT Solutions. Fe wnaeth gymaint o argraff fel y cafodd gynnig aros ymlaen yn barhaol dri mis ar ôl cychwyn y rhaglen chwe mis. 

Ychwanega Curtis: “I mi, mae Twf Swyddi Cymru wedi bod yn fuddiol ac mae wedi fy ngalluogi i gael y profiad gwaith rydw i ei angen i ddilyn  fy ngyrfa yn lleol.

“Rydw i wedi cael y cyfle i fynd i weminarau a chael hyfforddiant yn Stoke. Ac mae yna fwy o gyfleoedd ar gyfer hyfforddiant a chael mwy o gymwysterau.”


Twf Swyddi Cymru yn adeiladu sgiliau

Mae Risc IT Solutions yn helpu cwmnïau i weithio’n ddoethach drwy ddarparu’r atebion TG priodol i’w heriau busnes. Sefydlwyd y cwmni yn 2001 ac erbyn hyn mae’n cyflogi 18 o weithwyr cyflogedig, gan gynnwys cyfarwyddwyr.

Meddai Jeremy Keane, y rheolwr gyfarwyddwr: “Fel busnes sy’n tyfu ac sy’n ceisio pwyso a mesur y costau, mae Twf Swyddi Cymru yn gwneud synnwyr oherwydd yr elfen ariannu a’r cymorth parhaus gan y darparwyr hyfforddiant allanol.

“Mae Twf Swyddi Cymru yn ffordd hawdd hefyd o recriwtio staff newydd i’r busnes. Erbyn hyn rydym wedi cael tri gweithiwr cyflogedig drwy’r cynllun ac mae pob un wedi aros yma. Dyw’r diffyg profiad mewn swydd ddim yn rhwystr i rywun mor gymwys â Curtis. Rydyn ni’n darparu hyfforddiant a’r unig beth rydyn ni’n gofyn amdano yw unigolyn sydd â’r deallusrwydd a’r cefndir i roi’r wybodaeth honno ar waith.”

"Mae bod â’r gallu i ychwanegu at “swigen dechnegol” y gogledd yn bwysig hefyd,” meddai Mr Keane. “Un o’n gwerthoedd craidd yw cefnogi’r economi leol. Rydw i wedi cael sgyrsiau â phrifysgolion lleol, gan gynnwys y rhai dros y ffin ym Manceinion a Lerpwl am gyfeirio’r doniau yn ôl i’r cyfeiriad hwn yn hytrach nag i ddinasoedd yn y de.”

“Mae yna swigen dechnegol yma yn y gogledd a dyw hynny ddim wedi’i gyfyngu i swyddi mynediad yn unig ond i swyddi uwch hefyd. Er enghraifft, cafodd ein pennaeth marchnata ei recriwtio o Lundain. Roedd o’r ardal hon yn wreiddiol ac am ddychwelyd yma. Mae un o’n cyfarwyddwyr wedi ymuno â ni o Microsoft hefyd.

“Cafodd Sean, ein gweithiwr cyntaf o Twf Swyddi, ei recriwtio dair blynedd yn ôl. Graddiodd gyda gradd dosbarth cyntaf mewn marchnata digidol. Astudiodd yn yr Alban ac roedd am ddychwelyd i’r gogledd ond roedd yn cael trafferth dod o hyd i waith. Erbyn hyn mae’n rheolwr cyfrifon marchnata gyda ni.”

Meddai Eluned Morgan, Gweinidog y Gymraeg a Dysgu Gydol Oes: “Mae Twf Swyddi Cymru yn cynnig cyfle perffaith i oedolion ifanc rhwng 16-24 sy’n awyddus i weithio ac sydd angen hwb i’w gyrfa gan ennill profiad gwerthfawr mewn swydd gyda thâl yr un pryd. Mae’r rhaglen nid yn unig yn rhoi cyfle i bobl ifanc ddysgu a datblygu sgiliau cyflogadwyedd hanfodol, ond mae’n gam cyntaf hollbwysig ar yr ysgol yrfaol hefyd.
 
“Mae Llywodraeth Cymru wedi ymrwymo i sicrhau bod ein sgiliau a’n rhaglenni cyflogadwyedd yn cefnogi pobl ifanc fel Curtis yn eu hymdrechion i ganfod swyddi gwerth chweil, gan roi cyfle hefyd i gwmnïau ledled Cymru i oroesi, ffynnu ac ehangu.”

Cymerwch y cam cyntaf tuag at eich gyrfa

Chwilio am swyddi gwag a dod i wybod sut i wneud cais am Twf Swyddi Cymru

Dilyn @twfswyddicymru ar Twitter

 Hoffi tudalen TwfSwyddiCymru ar Facebook.

Ydych chi’n gyflogwr gyda diddordeb? Dewch i wybod mwy

Angen mwy o help? Cysylltwch â ni


 

 

 



Croeso i Gyrfa Cymru

Dewiswch iaith

Cymraeg

Welcome to Careers Wales

Please select your language

English